சுற்றுலாப் பயணிகளின் சொர்க்கபுரியாகத் திகழும் ஆஸ்திரேலியாவின் சிட்னி நகரில் உள்ள பாண்டி பீச் (Bondi Beach), நேற்று ரத்தக் களறியாக மாறியது. ஞாயிற்றுக்கிழமை மாலை (டிசம்பர் 14) மக்கள் கூட்டம் நிரம்பியிருந்த கடற்கரையில், மர்ம நபர்கள் நடத்திய துப்பாக்கிச் சூட்டில் 12 பேர் பரிதாபமாக உயிரிழந்தனர். 29-க்கும் மேற்பட்டோர் படுகாயமடைந்துள்ளனர்.
நடந்தது என்ன? ஞாயிற்றுக்கிழமை மாலை சுமார் 6:45 மணியளவில், பாண்டி பீச்சின் வடக்கு பகுதியில் யூதர்களின் ஹனுக்கா (Hanukkah) பண்டிகை கொண்டாட்டம் நடைபெற்று வந்தது. “கடற்கரையில் ஹனுக்கா” (Hanukkah by the Sea) என்ற இந்த நிகழ்ச்சியில் குடும்பங்கள், குழந்தைகள் எனப் பலர் கூடியிருந்தனர்.
அப்போது, கருப்பு உடை அணிந்த இரண்டு மர்ம நபர்கள், அங்குள்ள ஒரு மேம்பாலத்தில் இருந்து மக்கள் கூட்டத்தை நோக்கிச் சரமாரியாகச் சுடத் தொடங்கினர். தானியங்கி துப்பாக்கிகள் (Automatic Rifles) மூலம் நடத்தப்பட்ட இந்தத் தாக்குதலில், விழாக்கோலம் பூண்டிருந்த கடற்கரை மரண ஓலங்களால் நிறைந்தது.
உயிரிழப்பு மற்றும் காயம்: இந்தத் கொடூரத் தாக்குதலில் இதுவரை 12 பேர் உயிரிழந்துள்ளதாக நியூ சவுத் வேல்ஸ் போலீஸ் உறுதி செய்துள்ளது. இதில் துப்பாக்கிச் சூடு நடத்திய ஒருவரும் அடக்கம். காயமடைந்த 29 பேர் சிட்னியில் உள்ள பல்வேறு மருத்துவமனைகளில் அனுமதிக்கப்பட்டுள்ளனர். இவர்களில் இரண்டு போலீஸ் அதிகாரிகளும் அடங்குவர். பலரது நிலைமை கவலைக்கிடமாக உள்ளதால் பலி எண்ணிக்கை அதிகரிக்கக்கூடும் என்று அஞ்சப்படுகிறது.
சிக்கிய தீவிரவாதி – நவீத் அக்ரம்: தாக்குதல் நடத்திய இருவரில் ஒருவரைப் போலீஸார் சுட்டுக் கொன்றனர். மற்றொருவர் படுகாயங்களுடன் கைது செய்யப்பட்டார். கைது செய்யப்பட்ட நபர் 24 வயதான நவீத் அக்ரம் (Naveed Akram) என அடையாளம் காணப்பட்டுள்ளார்.
சம்பவ இடத்திற்கு அருகில் நிறுத்தப்பட்டிருந்த கார் ஒன்றில் வெடிப்பொருட்கள் (IEDs) இருந்ததையும் போலீஸார் கண்டுபிடித்துச் செயலிழக்கச் செய்தனர். இது திட்டமிடப்பட்ட ஒரு பயங்கரவாதத் தாக்குதல் (Terrorist Incident) என்று ஆஸ்திரேலிய அரசு அறிவித்துள்ளது.
ஹீரோவான பொதுமகன்: துப்பாக்கிச் சூடு நடந்துகொண்டிருந்த அந்தப் பதற்றமான சூழலிலும், ஒரு தைரியமான பொதுமகன் துப்பாக்கி ஏந்திய ஒருவரைப் பின்புறமாகப் பாய்ந்து தாக்கிய வீடியோ காட்சிகள் வெளியாகி மெய்சிலிர்க்க வைத்துள்ளன. அந்த வீரரின் செயல் பல உயிர்களைக் காப்பாற்றியிருக்கலாம் எனக் கூறப்படுகிறது.
பிரதமர் கண்டனம்: ஆஸ்திரேலியப் பிரதமர் அந்தோனி அல்பானீஸ் (Anthony Albanese), “இது யூதச் சமூகத்தைக் குறிவைத்து நடத்தப்பட்ட தீய செயல் மற்றும் பயங்கரவாதம். ஹனுக்கா பண்டிகையின் மகிழ்ச்சியான நாளில் இப்படியொரு கொடூரம் நடந்திருப்பது நம் நாட்டின் இதயத்தையே உலுக்கியுள்ளது” என்று வேதனையுடன் தெரிவித்துள்ளார்.
இஸ்ரேல் – காசா போர் சூழலில், உலகம் முழுவதும் யூதர்களுக்கு எதிரான வெறுப்புணர்வு அதிகரித்து வரும் நிலையில், இந்தத் தாக்குதல் ஆஸ்திரேலியாவில் பெரும் அச்சத்தை ஏற்படுத்தியுள்ளது.