சர்க்கரை நோயாளிகளுக்கு நாவல் பழம் நல்லது என்கிறார்கள். மேலும், நாவல்பழக் கொட்டையைப் பொடித்து தண்ணீரில் கலக்கிக் குடித்தால் சர்க்கரை கட்டுப்பாட்டுக்குள் வரும் என்கிறார்கள். இது உண்மையா? சித்த மருத்துவர்கள் சொல்வது என்ன?
“பொதுவாக நீரிழிவு நோயாளிகளை எல்லாப் பழங்களையும் எடுத்துக்கொள்ள அறிவுறுத்த மாட்டோம். அவர்கள் சாப்பிட அனுமதிக்கப்படுகிற பழங்களில் முக்கியமான ஒன்று நாவல்பழம், நாவல் பழம் கிடைக்கும் சீசனில், ஒரு நாளைக்கு 3 முதல் 4 பழங்கள் வரை சாப்பிடலாம். முடிந்த அளவுக்கு அந்தக் காலத்தில் அதிகம் கிடைக்கும் நாட்டு நாவல் பழமாகப் பார்த்துச் சாப்பிடுவது மிகவும் சிறந்தது.
நாவல்பழத்தில் ‘ஜம்போலின்’ (Jambolin) என்ற வேதிப்பொருள் இருக்கிறது. நீரிழிவு நோயாளிகளுக்கு ஏற்படும் உப பாதிப்புகளைத் தடுக்கும் தன்மை கொண்டது இந்த வேதிப்பொருள்.
பளிச்சென்ற நிறத்தில் இருக்கும் காய்கறி, பழங்கள் எல்லாவற்றிலுமே பாலிபினால் (Polyphenol ) அதிகமிருக்கும். ஆன்டிஆக்ஸிடன்ட் மற்றும் ஆன்டி இன்ஃப்ளமேட்டரி தன்மைகள் கொண்ட அவை, நீரிழிவு நோயாளிகளின் ஆரோக்கியத்துக்கு உதவக்கூடியவை.
நீரிழிவால் ஏற்படும் பாலிடிப்சியா (Polydipsia) எனப்படும் நீர் வேட்கையைத் தடுக்கும் தன்மை நாவல் பழத்துக்கு உண்டு என்று சித்த மருத்துவத்தில் சொல்லப்படுகிறது.
இதே தன்மை நாவல்பழக் கொட்டைக்கும் உண்டு. நாவல்பழக் கொட்டைகளைக் காயவைத்துப் பொடித்ததை அரை டீஸ்பூன் அளவுக்கு தண்ணீரில் கரைத்து அவ்வப்போது எடுத்துக்கொள்ளலாம்.
நாவல்பழம் நீரிழிவுக்கு நல்லது என்பதால் இதை மட்டுமே சாப்பிடுவதால் நீரிழிவு குணமாகிவிடும் என நினைக்க வேண்டாம். நீரிழிவாளர்கள் எடுக்கக்கூடிய மருந்து மற்றும் சிகிச்சைகளோடு வாய்ப்பு கிடைக்கும்போது நாவல் பழத்தையும் சாப்பிடலாம்.
எனவே, பிற சிகிச்சைகள், உணவுக்கட்டுப்பாடு, வாழ்வியல் மாற்றங்கள் போன்றவற்றோடு நாவல் பழம் சாப்பிடுவதையும் சேர்த்துச் செய்யும்போது நிச்சயம் கூடுதல் பலன் கிடைக்கும்” என்று சித்த மருத்துவர்கள் சொல்கிறார்கள்.
செய்திகளை உடனுக்குடன் பெற மின்னம்பலம் வாட்ஸ் ஆப் சேனலில் இணையுங்கள்…
கிச்சன் கீர்த்தனா : பாகற்காய்- வேர்க்கடலைக் குழம்பு!
டிடிஎஃப் வாசனுக்கு வாகனத்துல கண்டம்: அப்டேட் குமாரு