சிலர் வயதுக்கேற்ற சரியான எடையில் இருப்பார்கள். ஆனாலும், நாளுக்கு நாள் தொப்பை மட்டும் அதிகமாகிக்கொண்டே போகும். இதற்கு என்ன காரணம்… தொப்பையை மட்டும் குறைக்க முடியுமா?
தொப்பை என்பது வயிற்றைச் சுற்றியுள்ள கொழுப்பையே குறிக்கிறது. கொழுப்பில் இரு வகைகள் உள்ளன. `விசெரல் ஃபேட்’ (Visceral fat) என்பது உடலின் உறுப்புகளைச் சுற்றிக் காணப்படுவது. `சப்கியூட்டேனியஸ் ஃபேட்’ (Subcutaneous fat) என்பது சருமத்தின் அடியில் காணப்படுவது.
ஊட்டச்சத்தில்லாத உணவுப்பழக்கம், உடற்பயிற்சியின்மை, ஸ்ட்ரெஸ், ஆல்கஹால், சரியான தூக்கமின்மை, மரபியல் எனப் பல காரணங்களால் தொப்பை உண்டாகலாம். இவற்றில் ஊட்டச்சத்தில்லாத உணவுப் பழக்கமே பிரதான காரணம். நாம் சாப்பிடுகிற உணவின் மூலம் உடலுக்குள் சேரும் கலோரிகள் மற்றும் உடலியக்கத்தின் மூலம் எரிக்கப்படும் கலோரிகள் இரண்டும் முக்கியமாகக் கவனிக்கப்பட வேண்டும்.
அந்த வகையில் சரிவிகித ஊட்டச்சத்துள்ள உணவுகளைச் சாப்பிடுவதும், கலோரிகளை எரிக்கும்விதமாக உடலியக்கத்துக்கு முக்கியத்துவம் கொடுப்பதும் அவசியமாகிறது. வயது ஆக ஆக நம் உடலின் வளர்சிதை மாற்றச் செயல்பாடு மந்தமாகத் தொடங்கும். தொப்பை விழுவதற்கு அதுவும் ஒரு காரணம்.
மரபியல் ரீதியாக சிலருக்கு வயிற்றைச் சுற்றி கொழுப்பு சேரும். இன்னும் சிலருக்கு உடல் முழுவதுமே கொழுப்பு சேரும். பெண்களைப் பொறுத்தவரை மெனோபாஸுக்கு முந்தைய `பெரி மெனோபாஸ்’ காலகட்டத்திலும் மெனோபாஸ் காலகட்டத்திலும் உடல் பருமன் கூடும். அந்தப் பருவத்தில் அவர்களது உடலில் நிகழும் ஹார்மோன் மாற்றங்களின் விளைவே இதற்குக் காரணம்.
கலோரிகளை கணக்கு செய்து மிகக் குறைவான கலோரிகளை நீண்டகாலத்துக்கு எடுக்கும் நிலையில், உடலானது, உணவுத்தேவையை உணர்ந்து, உடலில் அதிக கொழுப்பைச் சேமிக்கத் தொடங்கும். ஒருவரது உடலில் ஹார்மோன் சுரப்பில் ஏற்படுகிற ஏற்ற, இறக்கங்களாலும் கொழுப்பு சேர்வது அதிகரிக்கலாம்.
உடல்ரீதியான மற்றும் மனரீதியான ஸ்ட்ரெஸ்ஸும் வயிற்றைச் சுற்றி கொழுப்பு சேர்வதில் முக்கியப் பங்கு வகிக்கும் என்பதைப் பலரும் அறிந்திருக்க மாட்டார்கள். அதாவது, ஸ்ட்ரெஸ்ஸாக இருக்கும்போது உடலில் கார்ட்டிசால் என்ற ஹார்மோன் அதிகம் சுரக்கும். அந்த ஹார்மோன் கொழுப்பைச் சேர்க்கக்கூடிய தன்மை கொண்டது. அது பசி உணர்வைத் தூண்டி, அதிக கலோரிகள் உள்ள உணவுகளையும் இனிப்புச்சத்து அதிகமுள்ள உணவுகளையும் சாப்பிடச் செய்யும். சில வகை மருந்துகளாலும் உடல் எடை அதிகரிக்கலாம். குறிப்பாக, வயிற்றைச் சுற்றிய கொழுப்பை அதிகரிக்கலாம்.
இந்த நிலையில், தொப்பையைக் குறைக்க வேண்டியது மிக முக்கியமானது. அதைக் குறைக்காத பட்சத்தில் நீரிழிவு, ஹைப்பர்டென்ஷன், உடல்பருமன் போன்ற பல பிரச்சினைகளும் பாதிக்கும். எனவே, உங்கள் விஷயத்தில் தொப்பைக்கான காரணம் என்னவென்று தெரிந்துகொண்டு அதற்கேற்ற சிகிச்சைகளை, வாழ்வியல் மாற்றங்களை உடனடியாகத் தொடங்க வேண்டும். ஊட்டச்சத்து ஆலோசகரை அணுகுங்கள். அவர் உங்களை முழுமையாகப் பரிசோதித்துவிட்டு உங்களுக்கான டயட் பிளான் மற்றும் வாழ்வியல் மாற்றங்களைப் பரிந்துரைப்பார்” என்கிறார்கள் டயட்டீஷியன்ஸ்.
செய்திகளை உடனுக்குடன் பெற மின்னம்பலம் வாட்ஸ் ஆப் சேனலில் இணையுங்கள்…
கிச்சன் கீர்த்தனா: சீட் ஸ்நாக்ஸ்
டிஜிட்டல் திண்ணை: அமுதா ஐ.ஏ.எஸ். மாற்றம்? விக்கிரவாண்டி, கள்ளக்குறிச்சி… ஸ்டாலின் போடும் பிளான்!