தொழில் தொடங்க ஏற்ற நாடுகள் – இந்தியாவுக்கு இரண்டாமிடம்

இருபது வளரும் நாடுகளில் மேற்கொள்ளப்பட்ட உலக சில்லறை வர்த்தக வளர்ச்சிப் பட்டியல் ஆய்வில், தொழில் தொடங்க ஏற்ற நாடாக இந்தியா இரண்டாம் இடம் பிடித்துள்ளது. முதலிடத்தில் சீனா உள்ளது. இதே பட்டியலில் கடந்த முறை 14-வது இடத்தில் இந்தியா இருந்தது. தொடர்ந்து வளர்ந்து வரும் ஜிடிபி (உள்நாட்டு மொத்த உற்பத்தி) விகிதம் காரணமாக, 13 இடங்கள் முன்னேறி தற்போது இரண்டாம் இடத்தை நம் நாடு பெற்றுள்ளது. 2015-16 நிதியாண்டில் ஜனவரி முதல் மார்ச் வரையிலான இறுதிக் காலாண்டில் இந்தியாவின் ஜிடிபி 7.9 சதவிகிதமாகப் பதிவானது. இதன் காரணமாக உலகிலேயே மிக வேகமாக வளரும் பொருளாதார நாடாக இந்தியா இடம் பிடித்தது. மேலும் சில்லறை வர்த்தக வளர்ச்சி விகிதம் 2013-ம் ஆண்டு முதல் 2015-ம் ஆண்டு வரையிலான காலகட்டத்தில் 8.8 சதவிகிதமாக இருந்தது குறிப்பிடத்தக்கது. இதன் காரணமாக இந்தியாவில் அந்நிய நேரடி முதலீடு தொடர்ந்து அதிகரித்து வருகிறது. இந்நிலையில் புதிதாக தொழில் தொடங்க ஏற்ற நாடுகள் பட்டியலில் இந்தியா முன்னணியில் இடம் பிடித்துள்ளது.