மின்னம்பலம் மின்னம்பலம்
புதன், 13 செப் 2017

நர மாமிசம் உண்ணும் விவசாயிகள் போராட்டம்!

நர மாமிசம் உண்ணும் விவசாயிகள் போராட்டம்!

டெல்லியில் தொடரும் விவசாயிகளின் இரண்டாம் கட்டப் போராட்டம் நாளுக்கு நாள் உக்கிரமடைந்துகொண்டிருக்கிறது. ஒவ்வொரு நாளும் ஒவ்வொரு நூதன வழியைத் தேர்ந்தெடுத்து போராடும் விவசாயிகள் அதிர்வலைகளை தொடர்ந்து எழுப்பி வருகிறார்கள். ஆனால் மத்திய, மாநில அரசுகள் இந்தப் போராட்டத்தை ஒரு பொருட்டாக கருதாமல் கடந்து செல்கின்றன.

டெல்லியில் நேற்று (செப்டம்பர் 12) கோவணத்துடன் மனித மண்டை ஓடு, கை, கால் எலும்பு துண்டுகளுடன் ஒரு கிலோ மீட்டர் தூரம் ஊர்வலம் புறப்பட்டார்கள் தமிழக விவசாயிகள். இறுதியில் மனித மாமிசத்தை உண்ணும் போராட்டத்தில் ஈடுபட்டனர். செய்தியாளர்களிடம் நேற்று டெல்லியில் பேசிய போராட்டக் குழுத் தலைவர் அய்யாக்கண்ணு, “வறட்சி நிவாரணம், இன்சூரன்ஸ் தொகையை தரவில்லை. அழிந்த பயிர்களுக்கு நஷ்டஈடு தரவில்லை. விவசாயிகளை பார்க்க மறுக்கும் பிரதமர் மோடியை கண்டித்து மனித எலும்பு, மாமிசத்தை சாப்பிட விவசாயிகள் தள்ளப்பட்டுள்ளதை உணர்த்தும் வகையில் இந்த போராட்டம் நடத்தப்படுகிறது. பிரதமர் மோடி எங்களின் குரலுக்கு செவி சாய்க்கவில்லை. தெருவில் உறங்கி போராட்டம் செய்து வருகிறோம். டெல்லியில் சாப்பாடு இல்லாமல் தவிக்கும் எங்களுக்கு குருத்துவாராவில் சீக்கியர்கள் உணவு தருகிறார்கள். பிரதமர் பார்க்க மறுத்தால் நாங்கள் ஜனாதிபதி மாளிகைக்கு செல்லப்போகிறோம். சாக அனுமதி தாருங்கள் என்று கூறி மனு அளித்து விட்டு கழுத்தை அறுத்துக்கொள்ளும் போராட்டத்தை நடத்தப்போகிறோம்“ என்று கூறினார்.

திங்கட்கிழமையன்று பின்புறம் கோவணத்தை நீக்கிவிட்டு அரை கோவணத்துடன் போராட்டம் நடத்தினர். இதனையடுத்து கோவணத்துடன் போராட்டம் நடத்திய அய்யாக்கண்ணு தலைமையிலான 31 விவசாயிகளை போலீஸார் கைதுசெய்தனர். பின்னர் இரவு விடுவிக்கப்பட்டனர் என்பது குறிப்பிடத்தக்கது.

புதன், 13 செப் 2017

chevronLeft iconமுந்தையது
அடுத்ததுchevronRight icon