மின்னம்பலம் மின்னம்பலம்
வியாழன், 5 அக் 2017

உணவு மற்றும் உடற்பயிற்சி: ஹெல்த் ஹேமா 05

உணவு மற்றும் உடற்பயிற்சி: ஹெல்த் ஹேமா 05

வீட்டில் களேபரம் செய்து கொண்டிருக்கும் பிள்ளைகள் அன்று மிக அமைதியாக இருக்கிறது என்றால் ஏதேனும் தவறு செய்திருக்க வேண்டும், பொருட்களை உடைத்திருக்க வேண்டும் அல்லது பள்ளியில் மதிப்பெண்கள் குறைவாக வாங்கி மதிப்பெண் சான்றிதழில் கையெழுத்து வாங்க காத்திருக்க வேண்டும்.

மனைவிமார்கள் திடீரென கணவருக்குப் பிடித்த சமையல் செய்தால் புடவை அல்லது நகைகள் வாங்குவதற்கான ஏற்பாடாகக் கூட இருக்கலாம்.

சில கணவன்மார்களின் நடவடிக்கைகள் மாறுபட்டால் முதலில் தற்கால மனைவிகள் கேட்கும் கேள்வி “குடிச்சிட்டு வந்துருக்கீங்களா”..

இதுபோன்ற பல அறிகுறிகள் தென்பட்டால் உடனே கணித்துவிடும் நாம், உடலில் ஏற்படும் பல மாற்றங்களே நமக்கான அறிகுறிகள் என்பதை புரிந்துகொண்டால், தெரிந்துகொண்டால் என்றென்றும் ஆரோக்கியமாக வாழ்ந்திடலாம். உறுப்புக்களின் அறிகுறிகளை வைத்தே என்ன நோய் என்பதை தெரிந்துகொள்ளலாம்.

கண்கள் உப்பியிருந்தால் என்ன வியாதி?

சிறுநீரகங்கள் மோசமாக இருப்பதைக் குறிக்கிறது. சிறுநீரகங்கள் உடலில் இருக்கும் கழிவுப் பொருட்களை அகற்றும் வேலையைச் செய்பவை. அவை சரிவர வேலை செய்யவில்லை என்றால், உடலில் சேரும் அசுத்த நீர் வெளியேற முடியாமல் போகும். இவை கண்களைச் சுற்றித் தேங்கி விடுவதால் கண்களைச் சுற்றி வீக்கம் போலத் தோன்றும்.

டிப்ஸ் உணவில் சேர்த்துக் கொள்ளப்படும் உப்பின் அளவைக் குறைத்துக் கொள்ளவேண்டும். மேலும் அதிகப்படியான நீர் அருந்துவது சிறுநீரகங்கள் சரியாக வேலை செய்ய உதவும்.

வெளுத்த நகங்கள் என்ன வியாதி?

இரத்த சோகை இருக்கிறது. இரத்தத்திலுள்ள சிகப்பணுக்கள் அளவில் குறையும்போது சின்னச் சின்ன வேலையைச் செய்வதற்கும் உடல் பலமின்றிப் போகும்!

ரத்தத்தின் சிவப்பணுக்கள் குறைவதால், இயல்பாக நகம் இருக்க வேண்டிய பிங்க் நிறம் போய், வெளுத்து விடுகின்றன.

டிப்ஸ் இரும்புச்சத்து இரத்தத்திலுள்ள சிகப்பணுக்களின் எண்ணிக்கையை அதிகரிக்கச் செய்யும். ஈரல், கீரைவகைகள், மற்றும் இறைச்சியை உணவுடன் சேர்த்துக் கொள்ளவேண்டும். அல்லது டாக்டரின் ஆலோசனையின்படி குறிப்பிட்ட நாட்களுக்கு இரும்புச்சத்து மாத்திரைகளோடு பி_12 மாத்திரைகளையும் எடுத்துக் கொள்வது நல்லது.

சிவந்த உள்ளங்கை என்ன வியாதி?

கல்லீரல் பிரச்னையாக இருக்கலாம். நோய்வாய்ப்பட்ட கல்லீரலால், நம் இரத்தத்திலுள்ள ஹார்மோன்களைக் கட்டுப்படுத்த முடியாமல் போகும். அதனால் உங்கள் ரத்தத்தின் நிறம் அதிக சிகப்பாகிவிடும். கல்லீரல் சரியாக வேலை செய்யவில்லை என்பதை, அதிக சிவப்பான உள்ளங்கைகள் தான் சட்டென காட்டிக் கொடுக்கும். காரணம் உடலின் மற்ற பாகங்களைவிட உள்ளங்கையின் தோல் மிகவும் மிருதுவாக இருப்பதுதான்.

டிப்ஸ் கீழாநெல்லியை வாரத்தில் ஒருதரம் சாப்பிடுவது கல்லீரலைச் சரிப்படுத்தும். உடம்பின் விஷத்தன்மையை மாதம் ஒரு முறையாவது போக்க, ஒரு நாள் பழம் மட்டும் சாப்பிடுங்கள்.

விரல் முட்டிகளில் வலி என்ன வியாதி?

ஆர்த்தரடீஸ் என்னும் மூட்டுவலி இருக்கிறது. இதனால் விரல் முட்டிகளில் வீக்கமும் வலியும் ஏற்படும். இந்த வலி அதிகமாக விரல் முட்டிகளில்தான் காணப்படும். அவை வடிவத்தில் சிறியதாக இருப்பதால், இந்த வலி உடனே வர வாய்ப்புண்டு. வயதானவர்களுக்கு மட்டுமே இந்த மூட்டுவலி வருவதில்லை. எந்த வயதுக்காரர்களுக்கும் வரலாம்.

டிப்ஸ் உடலுக்குத் தேவையான கால்சியம் மற்றும் வைட்டமின் சி சரியான அளவில் எடுத்துக் கொண்டால் மூட்டு வலி வருவதைக் குறைக்கலாம். ஒழுங்கான உடற்பயிற்சிகள் மற்றும் உடல்பருமனைக் குறைத்தல் இரண்டும் மூட்டு வலி வராமல் தடுக்கும்.

ஹெல்த் ஹேமா 01

ஹெல்த் ஹேமா 02

ஹெல்த் ஹேமா 03

ஹெல்த் ஹேமா 04

வியாழன், 5 அக் 2017

chevronLeft iconமுந்தையது
அடுத்ததுchevronRight icon